14. marts 2002 UPA 2002/06
Nassuiaatit nalinginnaasut
Siunnersuutip imarai § 1-imi nr. 1-ip aamma 3-p allanngortinnerat inatsisip 1986-imeersup oqaasertai naleqqussarniarlugit. § 27, imm. 1-imi allannguutinut siunnersuutigineqartunut Kalaallit Nunaanni Inuutissarsiummik ingerlataqartut Kattuffiata, FANG, atorunnaarsinneqarsimanera, taassumalu ingerlatsinerata Arbejdsgiverforeningen for Handel, Service, Transporterhvervene og IT i Grønland-imi, HST-mit aamma Kalaallit Nunaanni Sulisitsisut Peqatigiiffiannit GA-mit ingerlatarineqalernerat aammalu Kalaallit Niuerfiata KNI-ip ingerlatseqatigiiffik ataasiusumiit KNI Pisiffiup namminersortunit ingerlatassanngortinneqarneranut atatillugu aggulunneqarsimanera pissutaapput.
§ 1, nr. 2-mi allannguutissatut siunnersuut § 1, nr. 5-imi allannguutissatut siunnersuutip kinguneraa.
§ 1, nr. 4-mi aamma 5-imi allannguutissatut siunnersuutinut pissutaavoq Atuisartunut Pisisartunullu Siunnersuisoqatigiit allattoqarfiata Atuisartunut Pisisartunullu Siunnersuisoqatigiit aamma Unammilleqatigiinnermut Ataatsimiititaliap 1. januar 2002-miit ataatsimoortumik allattoqarfeqalersinnerisigut nukittunerulersinneqarsimanera.
Atuisartunut Pisisartunullu Siunnersuisoqatigiit aamma Unammilleqatigiinnermut Ataatsimiititaliap ataatsimoortumik allattoqarfiata nukittunerulersinneqarneratigut siunertaasimavoq sullissiviit inatsisikkut aalajangikkat taakku marluk sunniuteqarnerulersinneqanissaat, tamatumuunalu unammilleqatigiinnermut inatsimmi aamma atuisartut pisisartullu pillugit inatsisiliani siunertaasut piviusunngortinneqarnissaat.
Ataatsimoortumik allattoqarfik nukittunerulersinneqareermat atuisartut pisisartullu pillugit inatsisiliat pillugit allaffissornikkut suliassat sapinngisamik amerlanerpaat ataatsimoortumik allattoqarfimmi tassani katersorneqarnissaat pissusissamisoorpoq.
Maannamut ilusiliisimaneq, taanna malillugu Atuisartunut Pisisartunullu Maalaaruteqartarfittut Ataatsimiititaliap allattoqarfia Atuisartunut Pisisartunullu Maalaaruteqartarfittut Ataatsimiititaliap siulittaasuaniissimalluni, taamanikkut pilersinneqarpoq atorluaaniarluni. Atuisartunut Pisisartunullu Siunnersuisoqatigiit aamma Unammilleqatigiinnermut Ataatsimiititaliap ataatsimoortumik allattoqarfiata nukittunerulerneratigut pissusissamisoorsorineqarpoq Atuisartunut Pisisartunullu Maalaaruteqartarfittut Ataatsimiititaliap allattoqarfikkut sullinneqarnerata allattoqarfimmit tassannga isumagineqalernissaa.
Atuisartunut Pisisartunullu Maalaaruteqartarfittut Ataatsimiititaliap suliassanik suliarinninnermut atatilugu allaffissornikkut suliassanik Atuisartunut Pisisartunullu Maalaaruteqartarfittut Ataatsimiititaliap siulittaasuata suliaqarunnaarsinneqarneratigut suliassanik suliarinnittarneq allannguuteqanngilaq.
Atuisartunut Pisisartnullu Maalaaruteqartarfittut Ataatsimiititaliap siulittaasua Naalakkersuisunit toqqarneqartarmat arlaannaannulluunniit attuumassuteqannginnissaq qularnaarneqarpoq.
Allaffissornikkut kingunerisassai
Ataatsimoortumik allattoqarfik pilersinneqarnermini aamma Atuisartunut Pisisartunullu Maalaaruteqartarfittut Ataatsimiititaliap allattoqarfiatut ingerlasinnaasutut angissusilerneqarmat inatsisissatut siunnersuut allaffissornikkut kinguneqassanngilaq.
Aningaasatigut kingunerisassai
Atuisartunut Pisisartunullu Maalaaruteqartarfittut Ataatsimiititaliap, Atuisartunut Pisisartunullu Siunnersuisoqatigiit aamma Unammilleqatigiinnermut Ataatsimiititaliap allattoqarfikkut sullinneqarnerannut aningaasaliissutit 2002-mut Inatsisartut aningaasanut inatsisaata akuersissutigineqarneranut atatillugu pissarsiarineqareerput. Taamaattumik inatsisissatut siunnersuutip akuersissutigineqarnera aningaasatigut kinguneqassasoq naatsorsuutigineqanngilaq.
Siunnersuut Atuisartunut Pisisartunullu Siunnersuisoqatigiinnut aamma Aningaasaqarnermut Pisortaqarfimmut isummerfigeqqusissutigineqarsimavoq. Taakkunannga oqaaseqatit ilanngunneqareerput.
Aalajangersakkanut ataasiakkaanut nassuiaatit
§ 1-mut
Nr. 1-mut
"Niuernermut Angallannermullu Pisortaqarfik"-mut taarsiunneqarpoq "Naalakkersuisut"-nit. Tamanna oqaasertaanik naleqqussaaneruvoq, taamaalilluni Namminersornerullutik Oqartussani pisortaqarfittut suliassaqarfiit allanngortarsimanerinut siunissamilu allannguutigisarumaagaanut taaguutaa eqqornerussammat.Nr. 2-mut
Allannguut ataani nr. 5-imi allannguutip taaneqartup kinguneraa innersuussinerlu immikkoortumut eqqortumut iluarsineqarluni.Nr. 3-mut
Kalaallit Nunaanni Inuutissarsiummik ingerlataqartut Kattuffiat, FANG, atorunnaarsinneqarsimavoq tassanilu ilaasortaasimasut Arbejdsgiverforeningen for Handel, Service, Transporterhvervene og IT i Grønland-imi, HST, aamma Sulisitsisut Peqatigiiffianni, GA, ilaasortaalersimapput. Tamanna tunngavigalugu siunnersuutigineqarpoq ilaasortaq siusinnerusukkut FANG-imit toqqarneqartartoq HST-mit toqqarneqartalissasoq. Sulisitsisut Peqatigiiffiat atuisartunut pisisartunullu maalaaruteqartarfittut ataatsimiititaliami ilaasortaatitaatitamik nammineerluni toqqaasareerpoq.Kalaallit Niuerfiat, KNI, KNI Pisiffik A/S-ip namminersortunit ingerlatassanngortinneqarneratigut ingerlatseqatigiiffinnut nammineersunut marlunnut avinneqarpoq. Siunnersuutigineqarpoq ilaasortaq siusinnerusukkut Kalaallit Niuerfiannit toqqarneqartartoq Pisiffik A/S-imit aamma KNI Pilersuisoq A/S-imit ataatsimoorullugu toqqarneqartalissasoq.
Allannguutit naleqqussaanerupput aammalu Atuisartunut Pisisartunullu Siunnersuisoqatigiit inuussutissarsiutinillu ingerlataqartut akornanni agguataarinermut allannguutaanani, tamannalu Atuisartunut Pisisartunullu Maalaaruteqartarfittut Ataatsimiititaliami ilaasortat inuttalersorneqarneranni siunertaavoq.
Nr. 4-imut
Siunnersuutigineqarpoq Atuisartunut Pisisartunullu Maalaaruteqartarfittut Ataatsimiititaliami siulittaasutut Naalakkersuisut toqqagaat Atuisartunut Pisisartunullu Maalaaruteqartarfittut Ataatsimiititaliap allattoqarfeqarnikkut suliassanik ingerlatsiunnaassasoq. Atuisartunut Pisisartnullu Siunnersuisoqatigiit allattoqarfiata nukittunerulersinneqarneratigut naatsorsuutigineqareerpoq taanna inuttaqarnikkut Atuisartunut Pisisartunullu Maalaaruteqartarfittut Ataatsimiititaliaannik aamma sullissisinnaalissasoq.Siunnersuutigineqartutut allannguinikkut siulittaasup Atuisartunut Pisisartnullu Maalaaruteqartarfittut Ataatsimiititaliap ataatsimiinnerini siulittaasutut allatsitullu inissisimanera peerneqassaaq.
Nr. 5-imut
Atuisartunut Pisisartunullu Siunnersuisoqatigiit allattoqarfiat aamma Atuisartunut Pisisartunullu Maalaaruteqartarfittut Ataatsimiititaliaannut allattoqarfittut ingerlassasoq siunnersuutigineqarpoq. Taamaalilluni Atuisartunut Pisisartunullu Maalaaruteqartarfittut Ataatsimiititaliaannut allattoqarfik Atuisartunut Pisisartunullu Siunnersuisoqatigiit allattoqarfiannut atalersinneqassaaq.
§ 2-mut
Siunnersuutigineqarpoq inatsartut inatsisaat ulloq 1. juni 2002-mi atuutilissasoq.